Dodoma, 15 Agosti 2026 — Serikali imetoa agizo kwa waajiri wote wa taasisi za umma kutenga bajeti ya michezo kila mwaka na kuwawezesha watumishi wao kushiriki kikamilifu katika Michezo ya Shirikisho la Michezo ya Wizara, Idara, Wakala za Serikali na Ofisi za Wakuu wa Mikoa (SHIMIWI), yanayotarajiwa kufanyika mkoani Kilimanjaro kuanzia tarehe 19 Septemba hadi 7 Oktoba 2026.
Agizo hilo limetolewa na Katibu Mkuu Ofisi ya Rais — Menejimenti ya Utumishi wa Umma na Utawala Bora, Bw. Juma Mkomi, wakati wa bonanza la uzinduzi wa michezo ya SHIMIWI lililofanyika jijini Dodoma. Bw. Mkomi alisisitiza kuwa waajiri wanapaswa kutenga fedha kila mwaka kwa ajili ya michezo na kutoa ruhusa kwa watumishi wanaochaguliwa kuwakilisha taasisi zao.
Ili kuhakikisha agizo hilo linatekelezwa, uongozi wa SHIMIWI umeelekezwa kufuatilia na kuwasilisha ripoti itakayoonyesha taasisi zilizoshiriki na zile ambazo hazijashiriki, ili hatua stahiki zichukuliwe dhidi ya waajiri wasiotoa ushirikiano.
Bw. Mkomi alieleza kuwa ushiriki wa watumishi wa umma katika michezo unaimarisha afya, umoja na mahusiano mema kati ya taasisi za Serikali, jambo linaloongeza tija katika utoaji wa huduma kwa wananchi. Alisisitiza kuwa ushindani uwanjani hauna budi kuendelezwa bila kuathiri undugu na ushirikiano baina ya watumishi.
Aidha, aliwakumbusha wanamichezo kuzingatia maadili ya utumishi wa umma muda wote wa mashindano, ikiwemo kuepuka matumizi ya kupita kiasi ya vileo, kwa kuwa wanabeba heshima ya taasisi zao na ya Serikali kwa ujumla.
Alibainisha kuwa Serikali inaendelea kuunga mkono michezo ya watumishi wa umma kupitia mashirikisho ya SHIMIWI, SHIMUTA na SHIMISEMITA, ambayo yanatoa jukwaa la kitaifa la kuwakutanisha watumishi kutoka sekta mbalimbali.
Kwa upande wake, Mwenyekiti wa SHIMIWI, Bw. Daniel Mwalusamba, alisema bonanza hilo ni sehemu ya utekelezaji wa mpango kazi wa mwaka wa shirikisho, na kuwahimiza Wizara, Idara na Taasisi zote kukamilisha usajili wa timu na wachezaji wao mapema kupitia mfumo huu.
